എയ്ഡഡ് സ്ഥാപനങ്ങളിലെ നിയമനങ്ങൾ പിഎസ്സിക്ക് വിടണമെന്ന് സിപിഎം കേന്ദ്ര കമ്മിറ്റി അംഗം എ.കെ. ബാലൻ. മുഖ്യമന്ത്രി ഈ വിഷയത്തിൽ അനുകൂലമായി പ്രതികരിച്ചിട്ടുണ്ട്. എസ്എൻഡിപിയും ഈ നിർദേശത്തോട് യോജിപ്പ് പ്രകടിപ്പിച്ചിട്ടുണ്ട്. എൻഎസ്എസിന് എതിർപ്പുണ്ടാകാൻ സാധ്യതയില്ലെന്നും ബാലൻ പറഞ്ഞു. സാമൂഹ്യനീതി ഉറപ്പാക്കാൻ എയ്ഡഡ് സ്ഥാപനങ്ങളിലെ നിയമനങ്ങൾ സർക്കാർ ഏറ്റെടുത്തേ മതിയാകു. കോഴയായി മാനേജ്മെന്‍റുകൾ വാങ്ങുന്ന കോടികൾ എവിടെ പോകുന്നുവെന്നും ബാലൻ ചോദിച്ചു. സമുദായങ്ങളുടെ സ്ഥാപനങ്ങളിൽ പാവപ്പെട്ടവർക്ക് നിയമനം ലഭിക്കുന്നില്ലെന്നും അദ്ദേഹം പറഞ്ഞു.
എയ്ഡഡ് സ്ഥാപനങ്ങളിലെ നിയമനങ്ങൾ പിഎസ്സിക്ക് വിടണമെന്ന സിപിഎം കേന്ദ്ര കമ്മിറ്റി അംഗം എ.കെ. ബാലന്‍റെ പ്രസ്താവനയെ എതിർത്ത് എൻഎസ്എസും കെസിബിസിയും. സർക്കാർ നീക്കത്തെ ശക്തമായി എതിർക്കുമെന്ന് എൻഎസ്എസ് ജനറൽ സെക്രട്ടറി ജി. സുകുമാരൻ നായർ അറിയിച്ചു. നിയമനം ഏറ്റെടുക്കുമെന്നത് സര്‍ക്കാരിന്‍റെ ഭീഷണിയാണെന്നും ക്രമക്കേട് നടത്തുന്ന മാനേജ്‍മെന്‍റിനെതിരെയാണ് നടപടി വേണ്ടതെന്നും കെസിബിസിയും വ്യക്തമാക്കി. അതേസമയം, എയ്ഡഡ് സ്കൂള്‍ നിയമനം പിഎസ്സിക്ക് വിടാന്‍ തയാറാണെന്ന് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശന്‍ പറഞ്ഞു. സര്‍ക്കാര്‍ ശമ്പളം നല്‍കുമ്പോള്‍ മാനേജ്മെന്‍റ് നിയമനം വേണ്ട. സംവരണം പാലിച്ചുള്ള നിയമനം പിഎസ്‍സി നടത്തട്ടേയെന്നും വെള്ളാപ്പള്ളി പറഞ്ഞു.
വെണ്ണല വിദ്വേഷ പ്രസംഗ കേസില്‍ പി സി ജോർജിന്റെ അറസ്റ്റ് രേഖപ്പെടുത്തി. തിരുവനന്തപുരം ഫോർട്ട് പൊലീസാണ് കൊച്ചിയിലെത്തി അറസ്റ്റ് രേഖപ്പെടുത്തിയത്. വിദ്വേഷ പ്രസംഗക്കേസിൽ പി.സി.ജോർജിന് അനുവദിച്ചിരുന്ന ജാമ്യം കോടതി റദ്ദാക്കിയിരുന്നു. തിരുവനന്തപുരം ജുഡിഷ്യൽ ഒന്നാം ക്ലാസ് കോടതിയുടേതാണ് നടപടി. ജാമ്യ വ്യവസ്ഥ ലംഘിച്ചു എന്നു ചൂണ്ടിക്കാട്ടിയാണ് ജാമ്യം റദ്ദാക്കിയത്. തിരുവനന്തപുരം ഹിന്ദുമത സമ്മേളനത്തിൽ പി.സി.ജോർജ് നടത്തിയ പ്രസംഗമാണ് കേസിന് ആധാരമായത്. വിദ്വേഷ പ്രസംഗ കേസിൽ പി.സി. ജോർജ് പാലാരിവട്ടം പോലീസ് സ്റ്റേഷനിലാണ് ഹാജരായത്. മകൻ ഷോൺ ജോര്‍ജിനൊപ്പമാണ് ജോര്‍ജ് എത്തിയത്. നിയമം പാലിക്കുമെന്ന് ജോര്‍ജ് മാധ്യമങ്ങളോട് പറഞ്ഞു. കീഴടങ്ങിയ പി.സി. ജോർജിനെ തിരുവനന്തപുരം ഫോർട്ട് പോലീസ് കസ്റ്റഡിയിലെടുത്തു. സിഐയുടെ നേതൃത്വത്തിലുള്ള സംഘമാണ് കസ്റ്റഡിയിൽ എടുത്തത്.
മുതിർന്ന കോൺഗ്രസ് നേതാവ് കപിൽ സിബൽ സമാജ്‌വാദി പാർട്ടിയിലേക്ക്. എസ്പി പിന്തുണയോടെ സിബൽ രാജ്യസഭയിലേക്ക് നാമനിർദേശ പത്രിക സമർപ്പിച്ചു. ഉടൻ തന്നെ അദ്ദേഹം എസ്പിയിൽ ചേർന്നേക്കുമെന്നാണ് റിപ്പോർട്ടുകൾ. കോണ്‍ഗ്രസ് നേതൃത്വത്തോട് കലഹിച്ചിരുന്ന ജി23 നേതാക്കളില്‍ ഒരാളായിരുന്നു കപില്‍ സിബല്‍. കോൺഗ്രസ് പുനരുജ്ജീവനം ലക്ഷ്യം വെച്ച് രാജസ്ഥാനിലെ ഉദയ്പുരിൽ നടന്ന ചിന്തൻ ശിബിരിലും സിബൽ പങ്കെടുത്തിരുന്നില്ല.
നടിയെ ആക്രമിച്ച കേസില്‍ അതിജീവിത മുഖ്യമന്ത്രി പിണറായി വിജയനെ കാണും. ഇന്നോ നാളെയോ മുഖ്യമന്ത്രിയുമായി കൂടിക്കാഴ്ച്ച നടത്തും. സര്‍ക്കാരിനെതിരെ നടി ഹൈക്കോടതിയില്‍ പരാതി നല്‍കിയ സംഭവം വിവാദമായ സാഹചര്യത്തിലാണ് കൂടിക്കാഴ്ച്ച. കേസില്‍ തുടരന്വേഷണം അട്ടിമറിച്ചെന്ന് ആരോപിച്ചാണ് സര്‍ക്കാരിനും വിചാരണക്കോടതിക്കുമെതിരെ നടി ഹര്‍ജി നല്‍കിയത്. നടന്‍ ദിലീപ് സര്‍ക്കാരിലെ ഉന്നതസ്വാധീനം ഉപയോഗിച്ച് കേസ് അട്ടിമറിക്കാന്‍ ശ്രമിക്കുന്നെന്നായിരുന്നു പരാതി. കേസില്‍ തട്ടിക്കൂട്ടിയ അന്തിമ റിപ്പോര്‍ട്ട് നല്‍കാന്‍ നീക്കം നടക്കുന്നെന്നും അതിജീവിത ആരോപിച്ചു. എന്നാല്‍ നടിയുടേത് അനാവശ്യ ആശങ്കയാണെന്നായിരുന്നു സര്‍ക്കാര്‍ നിലപാട്. ഈ ഹര്‍ജിക്കെതിരെ ഗുരുതര ആരോപണവുമായി സി.പി.എം നേതാക്കള്‍ രംഗത്തെത്തിയിരുന്നു.
നടിയെ ആക്രമിച്ച കേസിൽ തുടരന്വേഷണം അട്ടിമറിക്കാൻ ശ്രമിക്കുകയാണന്ന അതിജീവിതയുടെ ഹർജിയിൽ ഹൈക്കോടതി സർക്കാരിന്റെ നിലപാട് തേടി. അതിജീവിത ഇടക്കാല ഉത്തരവ് ആവശ്യപ്പെട്ടെങ്കിലും കോടതി അനുവദിച്ചില്ല. സർക്കാരിൻ്റെ വിശദീകരണം വേണമെന്നും കിട്ടിയിട്ട് പരിഗണിക്കാമെന്നും കോടതി വ്യക്തമാക്കി. അന്വേഷണം നടക്കുന്നില്ലെന്ന് അതിജീവിത ആരോപിച്ചു. അതിജീവിതയുടെ ഭീതി അനാവശ്യമാണന്ന് പ്രോസിക്യൂഷൻ ചൂണ്ടിക്കാട്ടി.
ലൈഫ് മിഷൻ പദ്ധതി ക്രമക്കേടിൽ അന്വേഷണം തുടരാൻ സിബിഐ സംഘത്തിന്‍റെ തീരുമാനം. വടക്കാഞ്ചേരി ലൈഫ് മിഷൻ ഫ്ളാറ്റ് നിർമ്മാണത്തിൽ ക്രമക്കേടുകൾ നടന്നുവെന്ന കേസിൽ സിബിഐക്ക് അന്വേഷണവുമായി മുന്നോട്ട് പോകാമെന്ന് സുപ്രീംകോടതി നിർദേശിച്ചിരുന്നു. സ്വർണകടത്ത് കേസിലെ പ്രതികളായ സരിത്ത്, എം.ശിവശങ്കർ, സ്വപ്നാ സുരേഷ് ഉൾപ്പെടെയുള്ളവരെ വീണ്ടും ചോദ്യം ചെയ്യാനാണ് സിബിഐയുടെ തീരുമാനം. സരിത്തിന് ചോദ്യം ചെയ്യലിന് ഹാജരാകാൻ സിബിഐ നോട്ടീസ് നൽകിയിട്ടുണ്ട്.
എയ്ഡഡ് സ്കൂളിലെ നിയമനങ്ങൾ സർക്കാരിന് വിടുന്ന വിഷയത്തിൽ ഇപ്പോൾ പ്രതികരിക്കാനില്ലെന്ന് പ്രതിപക്ഷ നേതാവ് വി.ഡി. സതീശൻ. ഇക്കാര്യം പാർട്ടിയിൽ ചർച്ച ചെയ്ത് നിലപാടെടുക്കുമെന്നും അദ്ദേഹം വ്യക്തമാക്കി.
നടിയെ ആക്രമിച്ച കേസിൽ മുഖ്യമന്ത്രിയേയും സർക്കാരിനേയും പരോക്ഷമായി വിമർശിച്ച് എഴുത്തുകാരി സാറാ ജോസഫ്. കേസിൽ നീതി കിട്ടുന്നതിന്‍റെ നാന്ദിയായാണ് സർക്കാർ അന്വേഷണം അവസാനിപ്പിക്കുന്നതെന്ന് സാറാ ജോസഫ് പരിഹാസരൂപേണ ഫേസ്ബുക്ക് പോസ്റ്റിൽ കുറിച്ചു.
വനംകൊള്ളക്കാരന്‍ വീരപ്പന്‍റെ സഹോദരന്‍ മാതയ്യന്‍ (75) മരിച്ചു. ഹൃദയാഘാതത്തെ തുടർന്ന് സേലത്തെ മെഡിക്കൽ കോളജ് ആശുപത്രിയിൽ ബുധനാഴ്ച പുലർച്ചെയോടെയായിരുന്നു അന്ത്യം. ജീവപര്യന്തം തടവിന് ശിക്ഷിക്കപ്പെട്ട് കഴിഞ്ഞ 34 വര്‍ഷമായി കോയമ്പത്തൂര്‍ സെന്‍ട്രല്‍ ജയിലില്‍ കഴിയുകയായിരുന്നു. 1987ല്‍ ഫോറസ്റ്റര്‍ ചിദംബരനാഥന്‍, ഗാര്‍ഡ് പഴനി എന്നിവരെ കൊലപ്പെടുത്തിയ കേസിലാണ് മാതയ്യനെ ശിക്ഷിച്ചത്.
വിജയ് ബാബു നാട്ടിൽ മടങ്ങിയെത്തിയാൽ മുൻകൂർ ജാമ്യാപേക്ഷ പരിഗണിക്കാമെന്ന് ഹൈക്കോടതി. വിജയ് ബാബു ആദ്യം നാട്ടിൽ എത്തട്ടേ, എന്നിട്ടാകാം തീരുമാനമെന്നാണ് കോടതിയുടെ പരാമർശം. ഹർജി പരിഗണിക്കുന്നത് വ്യാഴാഴ്ചത്തേക്ക് മാറ്റുകയും ചെയ്തു. കഴിഞ്ഞ ദിവസം മുൻകൂർ ജാമ്യാപേക്ഷ നാട്ടിലേക്കുള്ള മടക്കയാത്രാ ടിക്കറ്റ് ഹാജരാക്കിയശേഷം പരിഗണിക്കാമെന്ന് ജസ്റ്റീസ് പി. ഗോപിനാഥ് വ്യക്തമാക്കിയിരുന്നു. ഈ സാഹചര്യത്തിൽ ടിക്കറ്റിന്‍റെ പകർപ്പടക്കം ഹൈക്കോടതിയിൽ സമർപ്പിക്കുകയും ചെയ്തിരുന്നു.
കരിപ്പൂർ വിമാനത്താവളത്തിൽ യാത്രക്കാരുടെ പ്രതിഷേധം. മൂടൽമഞ്ഞിനെ തുടർന്ന് രണ്ടു വിമാനങ്ങൾ റദ്ദാക്കിയതിന് പിന്നാലെയാണ് യാത്രക്കാർ പ്രതിഷേധവുമായി എത്തിയത്. അബുദാബി, ഷാർജ സർവീസാണ് മുടങ്ങിയത്.
എയ്ഡഡ് നിയമനം പിഎസ്സിക്ക് വിടാനുള്ള സർക്കാർ നീക്കത്തിൽ പ്രതികരിക്കാതെ വിദ്യാഭ്യാസമന്ത്രി വി. ശിവൻകുട്ടി. ഇതുമായി ബന്ധപ്പെട്ട് എ.കെ. ബാലൻ പറഞ്ഞത് ശ്രദ്ധയിൽ പെട്ടില്ലെന്ന് മന്ത്രി മാധ്യമങ്ങളോട് വ്യക്തമാക്കി.
ആലപ്പുഴയിൽ ഹൗസ്ബോട്ടിന് തീപിടിച്ചു. പള്ളാത്തുരുത്തിയിലാണ് സംഭവം. ആളപായമില്ല. ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് വിലയിരുത്തൽ.
വിലക്കയറ്റത്തിനും തൊഴിലില്ലായ്‌‌മക്കും കേന്ദ്ര സർക്കാരിന്റെ തെറ്റായ നയങ്ങൾക്കുമെതിരെ ഞായറാഴ്‌‌ച എൽഡിഎഫ്‌ പ്രതിഷേധം സംഘടിപ്പിക്കും. എറണാകുളം ഒഴികെയുള്ള ജില്ലകളിലെ പ്രധാന കേന്ദ്രങ്ങളിൽ 29ന് വൈകിട്ട്‌ നാലിനാണ്‌ ദേശീയ പ്രക്ഷാഭത്തിന്റെ ഭാഗമായുള്ള പ്രതിഷേധ സംഗമം.
എല്ലാ വര്‍ഗീയതയെയും ഒരുപോലെ നേരിടുമെന്ന് മുഖ്യമന്ത്രി പിണറായി വിജയൻ. എന്തും വിളിച്ചു പറയാന്‍ കേരളത്തില്‍ പറ്റില്ല. എന്തും വിളിച്ചു പറഞ്ഞാല്‍ നാട് അംഗീകരിക്കില്ല. മതനിരപേക്ഷതക്ക് ഹാനിയുണ്ടാക്കുന്ന ഒന്നും അംഗീകരിക്കില്ല. വർഗീയ ശക്തികളോട് ഒരു തരത്തിലുമുള്ള വിട്ടുവീഴ്ചയും ഉണ്ടാകില്ലെന്നും കടവന്ത്രയിലെ തെരഞ്ഞെടുപ്പ് പ്രചരണത്തിൽ മുഖ്യമന്ത്രി പറഞ്ഞു.
നാട്ടിൽ നാശം വിതക്കുന്ന കാട്ടുപന്നികളെ വെടിവെക്കാൻ തദ്ദേശ സ്ഥാപനങ്ങൾക്ക് അനുമതി നൽകിയെന്ന് വനം വകുപ്പ് മന്ത്രി എ കെ ശശീന്ദ്രൻ. കാട്ടുപന്നികളെ ക്ഷുദ്രജീവിയായി കേന്ദ്ര സർക്കാർ പ്രഖ്യാപിക്കാത്ത സാഹചര്യത്തിലാണ് മന്ത്രി സഭായോഗം ഇക്കാര്യം തീരുമാനിച്ചതെന്ന് വനം മന്ത്രി കോട്ടയത്ത്‌ അറിയിച്ചു. ലൈസൻസ് ഉള്ള തോക്കുകൾ ഇതിനായി ഉപയോഗിക്കാമെന്നാണ് നിർദേശം.
പോണ്ടിച്ചേരിയിലുണ്ടായ വാഹനാപകടത്തിൽ രാമനാട്ടുകര സ്വദേശിനിയായ വിദ്യാർത്ഥിനി മരിച്ചു. രാമനാട്ടുകര പൂവ്വന്നൂർ രാമചന്ദ്രൻ റോഡിൽ പുതുപറമ്പത്ത് മന്നങ്ങോട്ട് കാനങ്ങോട്ട് പ്രേമരാജന്റെ മകൾ അരുണിമ പ്രേം (22) ആണ് മരിച്ചത്.
തൃശൂർ എടമുട്ടത്ത് ക്ഷേത്ര കുളത്തിൽ കുളിക്കാനിറങ്ങിയ പ്ലസ് വൺ വിദ്യാർത്ഥി മുങ്ങിമരിച്ചു. ചിയ്യാരം സ്വദേശി കിഴക്കേപ്പാട്ട് വീട്ടിൽ വിനോദിന്റെ മകൻ അഭിഷേക് (17) ആണ് മരിച്ചത്.